Se spande par tuta la campagna
el profumo dell’erba fenada,
i papaveri i è ciari in mezo al gran,
e le spighe grasse le promete ben.
– Moreto, se le robe le và come penso,
è rivà el momento che crompema el trator –
Così me dise me Bupà, sodisfà,
slongando la man verso i campi in fior.
Le vache, colegade in stala, le tase,
la Bionda e la Bianchina i è strache,
le g’à visto passar tante stagion,
e sempre lore tacade sl zo’.
‘Na matina de bon’ora ghe rivà el mediator
Con on’omo in gravata e lustro
Sora on’automobile de lusso,
con far educà el mostra i depliant.
Dopo ore e ore de calda discusion,
el mediator el ne ciapa par le man:
bati e ribati, questi i è i pati.
- Femo conto tondo, zento mila par aconto
Dosento ala trebia del formento
E aretanti in sta’utuno al formenton
Par ‘stan che ven, tre cambiali da tresento
E ognun g’à d’esar contento,
e tra ‘na stimana el trator novo in l’ara.
Par mediazion tre galine e on capon.
Puntuale dopo ‘na stimana el trator l’è rivà,
trenta cavai, rosso fiamante, scappamento in alto,
presa de forza, fanai davanti e de drio,
in on batar d’ocio tuta la contrada la le scuriosava.
El motore el cantava come on osignol
tra, tra, tra…el ‘ndasea avanti in dre
a zanca a drita, me parea d’essar in pista,
el can che baiava, le galine che parea mate,
i buteleti che sbraiava a tuto fià,
ghera ‘na cagnara come fuse on carneval.
El gran sogno, de tuta la famea, el sea realizà,
fruto de l’union dei sudori e dei dolori
del tener strico e no’ butar via gnanca le scoreze.
Me parea d’essar on gran signor e pensava!..
quando ‘ndarò a arar quardar el versor stando sentà
e senza dover sbraiar, dai Bionda forza Bianchina!..
ma no’ so se sto’ trator el me guardarà
con chi duo ci tendarini, come le fasea lore?!..