L’è ‘na storia antica e contadina
de do’ vache, la Bionda e la Bianchina
no’ l’è par larghe ‘n’aprezamento
ma le meritaria on monumento:
iera bone, brave, simpatiche e bele
e me le tegnea come do’ sorele…

Ala mattina le smergolava de bon’ora
par farme capir che l’era l’ora…
zo dal leto disendo qualche orazion
E via in stala a darghe on bocon:
dal mucio del fen qualche sforcada
quattro canari e ‘na bela streada
e fin che le magnava de gusto e chiete
mi, con fadiga ghe tirava le tete…
ghe pisava on late profuma e bon
ch’el servea da zena e colazion.
Ma iera anca ciose… come on trator…
Le tirava el caro l’erpego e el versor
col passo calmo e el zoo sula copa
e i buteleti che ghe montava in gropa.

In de la stagion del tempo bruto
in la so’ staleta se fasea de tuto:
“Scola del rangiarse in laori manuali
con scambi agroculturali tradizionali”
- le done col filarin le filava la lana
altre fil e gucia le pezava ‘na sotana
le pusé vece le sferuzava le scapinele
el ricamo l’era la pasion de le butele
ghera el veceto che contava le fole
e i butei che ociava le gambe de la Iole
i buteleti, i imparava a zugar a carte
e i omeni che i fasea le so’ arte.

in tuto sto’ bagordo, la Bianchina
indiferente, la lecava la so’ bisina
inveze la Biona, ruminando tra i denti
la guardava tuti ‘sti pitochi soridenti
che i pasava la giornada al caldin
sparagnando requanta legna dal camin.